Umubos hin dako an ihap han mga kabataan nga nagta-trabaho o child laborers ha nasud tikang ha 828,000 dida han 2022 ngada ha 509,000 dida han 2024 mahitungod ha mas ginpahugot nga kampanya han gobyerno kontra ha child labor, subay ha Department of Labor and Employment (DOLE).
Ginmalatumat han DOLE nga resulta ini han mas madig-on nga mga programa han gobyerno ngan pakikigbinuligay han iba-iba nga sektor agud maihirayo an mga kabataan ha mapaningabot nga pagtrabaho ngan masigurado nga magpapabilin hira ha iskuylahan.
Kadungan han selebrasyon han Adlaw han Kagawasan kakulop nga adlaw, nanawagan hi Labor Secretary Francis Tolentino ha publiko nga bumulig ha pagduduso hin usa nga klase hin kagawasan para ha mga kabataan—an kagawasan tikang ha child labor.
Gintagand-uon gihapon han sekretarya an importansya han urusa nga paggios samtang nakikiusa an Pilipinas ha pagselebrar han World Day Against Child Labor 2026 ha ilarom han tema nga “Red Card to Child Labor: Fair Play for Children, Decent Work for Adults.”
Sumala kan Tolentino, gin aaghat han tema an mas mahugot nga pagpapatuman han mga polisiya ngan programa nga panuyo pugngan ngan puypuyon an child labor ha nasud.
Kumo kaparte han usa kabulan nga kampanya, nagdudumara an mga buhatan han DOLE ha bug-os nga nasud in magkadiru-dilain nga aktibidad kaupod an information and advocacy drives, service caravans, orientation tungkol sa Republic Act No. 9231, panhatag han livelihood assistance, gift-giving activities ha ilarom han Project Angel Tree, DOLEkula Film Festival, at mga Run for a Cause events.
