Nagtutuo hi Senator Erwin Tulfo nga mahihimo nga dako nga kakarawdan para ha Senado kun magkakaada hin kudeta ha liderato hini agud mapugngan an impeachment proceedings kontra kan Bise Presidente Sara Duterte.
An pamahayag ni Tulfo in kasunod han pag paso han iristuryahon han daw plano nga paiwason ha iya pwesto kumo Senate President hi Senator Vicente Sotto III ugsa pa man maipadara ha Senado an Articles of Impeachment tikang ha House of Representatives.
Sumala ha senador, makukurian pag eksplika ha publiko kun kay ano kinahanglan magkamay-ada hin pagbabag-o ha liderato kasunod han nakatalaan nga impeachment trial.
Para kan Tulfo, diri sadang gamiton an pagbabalyo hin liderato kumo pamaagi agud paiha-on o pugngan an constitutional process han impeachment.
Igin duon pa hini nga mas makakaupay kun papasagdan nala nga umabante an hearinh agud magkaada hin higayon hi Duterte nga batonon an mga alegasyon kontra ha iya.
Una na nga gin malatumat ni Sotto nga dayon magios an Senado ha oras nga makarawat hini an Articles of Impeachment.
Samtang, sumala naman kan Senador Sherwin Gatchalian nga diri angay pag iristuryahan an pagbabalyo hin liderato ha butnga han impeachment mahitungod nga obligasyon han Senado nga hingadayan an kaso ha ilarom han Konstitusyon.
