TACLOBAN CITY– Naglalarab na an kalayo han maabtan hiton mga otoridad an usa ng kotse ha atubangan hiton gym ha may Aguas St. Brgy. Ponong Carigara Leyte.
Sumala kan SFO1 Cherry Ann Espinosa,Duty Investigator, Carigara Municipal Fire Station, pasado alas 8:30 hiton gabi natabo an sunog.
Subay ha inisyal nga imbestigasyon, nabaraka an 2 nga sakay han nasabi nga sarakyan matungod ha pag- on hiton engine han sarakyan, in tigda la ine nga nag-araso ngan ira ine ginparaong, dayon naman hira nga nagkagawas, ngan pira la ka-minutos in nagkakalayo na an atubangan nga parti hine.
Waray naman may nasamaran o naawat an kinabuhi ha nasabi nga insidente.
Ha pagkayana, padayon pa an ginhihimo nga imbestigasyon han mga otoridad, kasumpay ha tinuod nga rason han paglarab han kalayo ha nasabi nga sarakyan.
