CARIGARA, LEYTE – Usa nga indibidwal an nag-prubar pagsulod hin kontrabando ha Carigara District Jail samtang nabisita ini ha usa nga Person Deprived of Liberty (PDL).
Ginkilala an dalaw kan alyas Mae, 40-anyos an pangidaron, ngan residente han Brgy. Santa Fe, Carigara, Leyte.
Sumala kan Carigara District Jail Acting Jail Warden, SJO4 Abraham Antivo Jr., umabot an dalaw ha District Jail banda alas-10:50 na han aga, kun diin an cut-off time han pagbisita ha jail in alas-11 han aga.
Mahitungod hini nagduda an mga jail officers sanglit gin pailarom ini ha proseso han strip search bisan pa man kun agsub na ini nga nabisita ha nasabi nga district jail.
Nagpirma an dalaw hin waiver kumo pagpamatuod nga nagtugot ini ha nasabi nga proseso kun diin durante han strip search in napansin han searcher an padding ha bra han dalaw. Ha pagpakianhi ha dalaw, in bumaton la ini nga daw padding la ini han iya bra pero han pagbahu-a han searcher in nahisabtan nga tabako ini.
Gin kumpiska naman tikang ha dalaw an tabako ngan ginpasabot ini han iya nagin pagtalapas ha BJMP Policy sugadman ha Municipal Ordinance han Carigara nga nagdidire ha pagpasulod hin mga kontrabando ha jail facility.
Gin isyuhan naman ini hin citation ticket para han iya nagin pagtalapas ngan ginpauli la anay ha ira. Ginpasa naman an citation ticket ha munisipyo han Carigara kaupod an report resolusyon han ira inmate disiplinary court.
