TACLOBAN CITY — Ginpahayag ni House Minority Leader ngan 4Ps Partylist Reprsentative Marcelino Libanan nga naniningkamot iton Kongreso nga mapondohan iton pagstudyo ha pagtitindugon nga tulay nga magkokonekta hiton Luzon ha Eastern Visayas pinaagi ha probinsiya hiton Sorsogon.
Sumala kan Libanan, ha national budget para ha 2025, maabot hin P100 million iton proposed fund para ha feasibility study hiton Matnog – Allen bridge.
Kon magawas ha pag istudyo nga pwede maghimo hin tulay tikang ha Bicol region tikanhi ha Eastern Visayas, masisiguro na magpapadayon iton pagbiyahe tikang ha Luzon pakanhi ha Siniarangan Bisayas bisan kon maraot iton panahon.
Dugang pa ni Libanan nga iton Matnog- Allen bridge iton magsosolbar hiton dekada na nga problema hiton pagka-stranded hiton mga pasaheros kon mayda bagyo ngan port congestion durante hiton peak season.
Mamiminus gihapon iton oras hiton biyahe tungod kay ha 90 minutos nga biyahe tikang ha Matnog Port ha Sorsogon kutob ha Allen Port ha Northern Samar in magigin 30 minutos nala ini kon mahimo na iton tulay.
Suportado naman ni Tingog Rep. Yedda Marie Romualdez, chair han House committee on account iton pag-alutaga hin pondo para hini nga proyekto.
