Gin kumpirma ni Foreign Affairs Secretary Theresa Lazaro nga mayda impormasyon an gobyerno nga aadto ha Paris an anay kongresista nga hi Zaldy Co, subay ha usa nga “highly regarded diplomatic source,” samtang padayon ini ginbabantayan han embahada han Pilipinas ha France.
Subay ha report, gin aalegar nga naghangyo hin asylum hi Co ha France mahuman hiya madabi ha kaso nga korapsyon. Naatubang ini, kaupod an 17 nga iba pa, ha kaso nga graft ngan malversation nga iginsalawad han Office of the Ombudsman ha Sandiganbayan kabahin han maanomaliya nga P289 million flood control project ha Oriental Mindoro.
Ginmalatumat han Sekretarya nga sensitibo an istoryahon han asylum ha ilarom han regulasyon han European Union, pero gin sigurado niya nga ginbubuhat han gobyerno an ngatanan han legal nga proseso agud maibalik hi Co ha nasud.
Syahan hini, gin kansela na han Department of Foreign Affairs (DFA) an diplomatic passport ni Co dida han Disyembre 2025, samtang an iya regular passport in paso na tikang pa dida han 2022.
Samtang, ginmalatumat han Malakanyang nga nagbibiling hin eksplinasyon hi Presidente Ferdinand Marcos Jr kun kay ano gin hangyo han France an pagpapagawas han Co tikang ha kustodiya han Czech Republic, gintawag hini nga “very unsatisfactory.”
