TACLOBAN CITY: Ginpaangbit hiton Department of Health Eastern Visayas, nga nagharamubo na iton ihap han mga natatapnan han pertussis ha rehiyon.
Sumala kan Jelyn Lopez Malibago, Information Officer, Department of Health Region 8, nga subay ha ira nagin monitoring tikang han Enero-Hunyo, nakaghipatik an ira buhatan hin 250 nga kaso han pertussis ha Eastern Visayas.
Dugang pa hine, nga ha nasabi nga ihap in 36 dinhi an kompirmado, ngan 214 naman an mga suspected cases.
Samtang, maikokonsidera ine nga hitaas, matungod nga waray may nahipatik nga kaso, han nakalabay nga tuig.
Gintagan hin duon ni Malibago, nga bisan man sugad an ihap in nagtitikahamubo naman ine, kun diin ha pagkayana in hinay-hinay ine nga naiibanan.
Mababaruan, nga kadam-an nga mga natatapnan han nasabi nga sakit in adton mga kabataan nga below 1 year old, ngan sugadman adton waray kabakunahi kontra pertussis.
