TACLOBAN CITY-Nagpahimatngon an Department of Health Eastern Visayas Center for Health Development (DOH-EVCHD) ha publiko kasumpay han paghikahitaas han kaso hiton Leptospirosis ha rehiyon.
Sumala kan Jelyn Lopez- Malibago, Information Officer Department of health Regional Office Vlll, nakaghipatik hira hin 117 nga kaso hiton leptospirosis, mas hitaas kumpara han nakalabay nga tuig nga maabot la 32 nga kaso an nahipatik han ira buhatan.
Dugang pa hine, nakaghipatik naman hira hin 8 nga namatay matungod han nasabi nga sakit, ngan mas hitaas gihapon ine nga ihap kumpara han nakalabay nga tuig nga ada la ha 2 iton nahipatik nga namatay.
Ginmalatumat hine nga han bulan hiton Abril, nagtikang nga humitaas an kaso han leptospirosis, matungod na gihapon han pagkakamayda hin mga pagbaha ha pira nga mga lugar, dara han maraot nga panahon.
Subay ha ira datos, an Leyte an may pinakahitaas nga kaso, ginsundan ine han Samar provinces, Tacloban, Southern Leyte, Ormoc, ngan Biliran.
Mababaruan nga kadam-an ha mga naduktan han nasabi nga sakit in kalalakin-an, kun diin 97% ha mga ine in na-hospitalized.
Ada naman ha 5-71 years old an mga pangidaron han mga nadukta han nasabi nga sakit.
Ha pagkayana, padayon nga gin-aagat han buhatan an publiko, nga batasanon nga maging malimpyo ha lawas, gumamit hin sakto nga hygiene, likayan nga lumusong ha kontaminado nga tubig-baha, ngan likayan gihapon an pagkunsumo han mga kontaminado nga tubig ngan pagkaon.
