TACLOBAN CITY – Ginkakabarak-an ha pagkayana an nahihipatik nga padayon nga paghitaas han mga kaso hin online sexual exploitation ha Sinirangan Bisayas.
Sumala kan Pol. Master Sgt. Sarah Mores, Investigator han Women and Children Cyber Protection han Regional Anti-Cybercrime Unit, tikang han pagbug-os han ira unit han tuig 2019, maabot na ha 12 nga mga kaso hin online sexual exploitation an napasaka ha korte ngan maabot ha 30 nga mga indibidwal an narescue kaupod na an an pinakabata nga duha pala kabulan.
Kasagaran ha mga operasyon in gindumara ha probinsya han Biliran kun diin nahisabutan nga an mga suspek in paryente la han mga biktima.
Nadiskubrehan gihapon nga ginsusugo han mga suspek an ira mga biktima nga magbuhat hin mga malaw-ay nga mga buruhaton ngan ira ini ginkukuhaan hin pictures ngan videos ngan ginpapasa liwat ha mga pedophiles ngan langyawanon nga mga customers.
Dugang pa ni Mores, nga madali-dali nga naaaghat an mga online traffickers ha pagbuhat hin internet child exploitation tungod han hitaas nga income nga ira nakukuha nga naabot ha P5,000 sobra kada sesyon.
Nahibaruan nga subay ha RA 9208 o an Expanded Anti-Trafficking in Persons Act, RA 9775 o an Anti-Child Pornography Act kasumpay ha RA 10175 o an Cybercrime Prevention Act, maatubang ha penalidad nga life imprisonment ngan multa nga dire maubos ha dos milyones kapesos.
