TACLOBAN CITY – Nadugngan hin tulo nga bag-o nga kaso an ihap han mga nagkabubuthan hin mga pabuto ha pagtapo han bag-o nga tuig 2023.
Sumala kan Jelyn Lopez-Malibago, Information Officer han Department of Health Regional Office 8, duha han mga biktima han paburuthon in tikang ha Samar, samtang usa naman an tikang ha Leyte.
Nag eedad naman hin 10-anyos ngada ha 45-anyos an pangidaron han mga nagkabibiktima, kun diin usa daw han mga biktima nga tikang ha Catbalogan City in nautdan pa hin usa nga tudlo.
Dugang pa han mao nga opisyal, waray ka mentinar an zero-cases nga target han yana nga tuig pero waray naman daw may nahipatik nga kaso hin pagkamatay mahitungod han paburuthon.
Mababaruan nga an mga paburuthon sugad han Kwitis, lantaka, ngan five-star an nagin hinungdan han pagkakabubuthi han mga ine.
Padayun naman nga nagpapaupay adton iba nga biktima samtang an iba liwat han mga ine in nakabalik na haira mga panimalay.
