TACLOBAN CITY – Sumaka na ha 101 katawo an naapektaran han sakit nga chickungunya ha Maripipi,Biliran.
Una hini, guindeklara an chickungunya outbreak ha mao nga lugar dida han mahipatik an sobra 70 katawo nga naka-eksperienya hini nga balatian ha lawas.
Sumala kan Dr. Gabino Velazquez, municipal health officer, nga an sakit nga chikungunya in syahan nga namonitor dida han nakalabay nga bulan han Abril kun diin tulo pala katawo an nakakuha hin virus tikang ha kagat han lamok.
Guinkumpirma liwat hini nga dagmit nga sumaka an ihap han naapektaran han mao nga sakit ha kaluyo nga umabot na ini ha 101 nga kaso pagkayana.
Ha kaluyo hini, nag-aghat naman hi Dr. Velaquez ha publiko nga batasanon an pagpanlimpyo ha sulod ngan ha kalibungan han kada tagsa nga panimalay para malikayan an mga lamok nga nagdudurot hin sakit nga chikungunya.
Mababaruan nga pira ha mga sintomas han chikungunya an pagkamay-ada hin hiranat ngan duro nga pagpanakit han mga kaluluthan hin haros pito kaadlaw.
