JALISCO, MEXICO – Nagdara hin kasamok ha Mexico mahuman mapatay han mga otoridad hi Mexican cartel boss Nemensio “El Mencho” Oseguera Cervantes.
Nagwala an mga miyembro han drug cartel kun diin ira gin-atake nira an pira nga opisina han gobyerno.
Ginkumpirma ni Mexican President Claudia Sheinbaum nga mayda 25 nga miyembro han Mexican National Guard an namatay kaupod an prison guard ngan personnel tikang ha State Attorney General’s office.
Kaupod ha namatay ha operasyon an walo nga miyembro han drug cartel.
Ginkumpirma han US nga bumulig hira ha paghahatag hin intelligence report agud madakop hi Cervantes.
Nagpasarang na an Mexican President hin 2,500 nga sundalo ha Jalisco ngan kahirani nga lugar agud mabantayan an pagbulos han mga miyembro han drug cartels.
