TACLOBAN CITY – Mas pinahugot an ginbubuhat nga pagbabantay han mga kapulisan ha Santa Margarita, Samar nga ginpailarom ha red category kasumpay han harani na nga piniliay.
Ini in kasunod na gihapon han nahitabo nga shooting incident ha ira bungto kun diin biktima in ginkilala kan Randy Uy, 45 anyos an pangidaron samtang an suspek naman nga iya la ngahaw kalugaringon bilas in ginkilala kan Salvador Getigan, 44 anyos, parehos mga barangay kagawad ngan mga residente han Brgy. Balud, Santa Margarita, Samar.
Sumala kan PLt. Lorven Deraco, Chief of Police han Sta. Margarita Police Station, basar ha ira inisyal nga imbestigasyon ginhihingita nga bahin han delito ha tuna an motibo han suspek ha iya ginbuhat nga panmumusil.
Waray naman daw ini kalabutan ha pulitika o anoman nga election-related issue sumala na gihapon ha pahayag han mga paryente han biktima.
Ha pagkayana in mahugot an pagbabantay han mga kapulisan ha Sta. Margarita kabulig an mga kasundaluhan agud nga masiguro nga waray na insidente hin panmumusil ha ira bungto nga matatabo ngan agud nga mamentinar an kahimyang yana nga pira nala kaadlaw an nasasalin san-o an adlaw han eleksyon ha Mayo 9.
