NATIONAL – Nag-atubang kakulop nga adlaw ha gindumara nga arraignment an kampo ni anay Negros Oriental Congressman Arnolfo ‘Arnie’ Teves Jr. ngan an parte ni Congresswoman-elect Janice Degamo nga asawa han ginpatay nga anay gobernador nga hi Roel Degamo.
Gindumara an nasabi nga pagbasa han sirot ha Manila Regional Trial Court Branch 51, ha syudad han Manila nga nag iha naman hin kulang kulang duha kaoras.
Dinhi gin atubang ni former Congressman Arnie Teves Jr. an mga ginkakadabihan hine nga kaso nga may paghisumpay ha pagpatay ha anay gobernador han Negros Oriental nga hi Roel Degamo dida han 2023.
Ginkakaatubang hine an 10 counts of murder, 13 counts of frustrated murder, ngan 4 counts of attempted murder mahuman hira nga igtudlok kumo mastermind ha luyo han nagin madugo nga pagpatay, duha na an nakalalabay.
Pero ha nahitabo nga pagbasa han sirot, nakausa kabeses pa nga naglikay nga bumaribad nga magsulod hin not guilty plea an anay kongresista sanglit an korte na an naghimo hine para haiya.
Samtang, ha parte naman nira Congresswoman-elect Janice Degamo, an iya abogado an nagrepresenta para han ira pag-atender.
Sanglit, maduhon nga ginpahayag han abogado hine nga hi Atty. Andrei Bon Tagum nga an paghihimo hin usa nga arraignment in kritikal para makab-ot an hustisya.
