Nagsalawad hin apela an kampo ni anay Presidente Rodrigo Roa Duterte ha International Criminal Court mahuman nga baribaran han Pre-Trial Chamber I an ira hangyo nga interim release o temporaryo nga paggawas.
Ginkumpirma han lead counsel ni Duterte nga hi Atty. Nicholas Kaufman nga igin salawad nira an apela “usa kasemana na an nakalabay” ngan gintawag niya nga “sayop” an nagin desisyon han huwes.
Ha iginpagawas nga 23-pages nga desisyon hadton Setyembre 26, iginduon han ICC nga kinahanglan magpabilin ha kustodiya hi Duterte agud malikayan nga maapektaran an imbestigasyon ngan mga proseso.
Gintudlok gihapon han huwes an posibilidad nga hiya in “flight risk” ngan pwede makaapekto ha mga testigos.
Ginbaribaran gihapon han ICC an argumento han depensa nga kinahanglan pagawson hi Duterte mahitungod ha edad nga kabutangan han panlawas hine, ngan ginmalatumat nga mayda supresyente nga serbisyo-medikal ha sulod han ICC Detention Center.
Pero subay ha kampo han anay presidente, dire daw “fit” hi Duterte nga umatubang ha hearing mahitungod ha cognitive decline, pero ginmalatumat han mga huwes nga waray supresyente nga ebidensya agud pamatud-an ine.
Samtang, suportado naman ni Mamayang Liberal Party List Representative Leila de Lima ngan pira nga human rights group an nagin desisyon han ICC, ngan ginmalatumat nga pagpamatuod la ine nga mayda sakto nga basaranan an kaso kontra ha anay presidente.
Waray naman maghatag hin komento hi Vice President Sara Duterte kasumpay ha kaso han iya tatay, ngan ginpahayag nga nakapukos anay hiya ha mga biktima han linog ha Davao Oriental.
