Papanginanuon han House of Representatives kun patiunan-o gingagastos an natirok nga bilyon-bilyon nga kantidad han travel tax.
Ine an ginpahayag ni House Tourism Committee Vice Chairperson ngan Palawan Rep. Gil Acosta kasunod han ginsalawad nga panukala ni House Majority Leader ngan Presidential son Sandro Marcos agud tanggalon an travel travel tax ha bansa.
Sumala kan Rep. Acosta, kinahanglang panginanuon parehas an paggastos ha travel tax revenues ugsa ngan kahuman han COVID-19 pandemic agud matudlok kun an mga ine in maupay nga nai-aalutaga ngan nagagamit para ha pagpapaursa ha industriya han turismo.
Dugang pa han magbabalaod, ada ha P4 bilyon ngada ha P5 bilyon an average travel tax collection kada tuig kun diin nahingangadto an natirok nga kantidad ha Tourism Infrastructure and Enterprise Zone Authority, Commission on Higher Education ngan cultural heritage sector.
Pira daw gihapon ha mga isyu nga kinahanglan mahugot nga kitaon han Kongreso in an mga tigdaay nga pag-ubos han koleksyon tikang han 2020 kutob 2023, mahitungod ha mga restriksyon nga iginpatuman ha kakusgan han pandemsya, sanglit importante daw nga makita kun patiunan-o gingagastos an pondo ha mga nakalabay nga tuig ngan kun ano an epekto hine ha turismo.
Nahingadayan gihapon han magbabalaod an usa ha pangunahon nga island destinayion han mga turista ha nasud, an Palawan, nga daw limitado an government-built facilities sugad han tourism comfort room.
Kasumpay hine, sumala kan Rep. Acosta, plano han tourism committee nga panginanuon an nasabi nga concerns ha butnga han mga debate kun kinahanglan na gud ba nga igreporma an pira kadekada nga travel tax o tanggalon na.
