Gin lalauman nga paghihingadayan ha Kamara yana nga Lunes an impeachment case kontra kan Vice President Sara Duterte, kaupod na an sponsorship, interpellation, ngan burotosay ha committee report ngan Articles of Impeachment.
Sumala kan Manila Rep. Joel Chua, nakatalaan nga an magigin pangunahon nga agenda han plenaryo an impeachment proceedings.
Mababaruan nga una na nga gin aprubaran han House Committee on Justice an impeachment complaints kontra kan Duterte ha botos nga 53-0 para ha probable cause ngan 55-0 naman para ha committee report han Articles of Impeachment.
Ha ilarom han 1987 Constitution, kinahanglan hin diri maubos hin 106 nga botos agud maipadara ha Senado an Articles of Impeachment para ha masunod nga hearing.
Gin malatumat pa ni Chua nga ma subra 200 nga mga mambaraod na an daw nag hatag hin suporta para ha impeachment han Bise Presidente.
Subay pa kan Chua, kumusog an suporta mahuman pag hingadayan ha mga nakalabay nga hearing an isyu han SALN, AMLC records, confidential funds, ngan iba pa nga alegasyon kontra ha bise.
Gin bubug-os an impeachment case ha upat nga Articles of Impeachment, kaupod na an daw sayop nga paggamit han confidential funds, unexplained wealth, bribery, ngan grave threats.
Igin duon pa ni Chua nga natagan na hin sakto nga higayon an kampo ni Duterte nga umatinder ngan magsumite hin ebidensya pero waray ini bubuhata han kampo ni Deterte.
Kun maaprubaran han Kamara, ginlalauman nga maipapadara ha Senado an Articles of Impeachment yana nga semana.
Posible gihapon aprubaran han Kamara ha mga masunod nga adlaw an prosecution panel nga puydi bug-oson nira Representatives Gerville Luistro, Chel Diokno, Leila de Lima, Rodge Gutierrez, Keith Flores, ngan Bel Zamora.
