TACLOBAN CITY -Nananawagan an Kadamay Tacloban ha administrasyon Duterte nga ig-undang na an nahihipatik nga extrajudicial killings ha nasod Pilipinas.
Ini an ira panawagan ha ira ginbuhat nga rally yana adlaw kasumpay han pagdumdom han ika 45 nga anibersaryo han pagdeklara han Martial Law.
Sumala kan Chris Durano Convenor han Kadamay Tacloban, iginkakabido han ira grupo nga waray ginbubuhat an administrasyon agud nga matagan hin hustisya adton mga namatay ha kampanya han ilegal nga droga.
Dugang pa hini nga ira gihapon iginkakabido an waray katuman nga mga saad ngan programa ni Presidente Duerte dida han nakalabay nga eleksyon.
Nakikita daw han grupo nga Kadamay nga diri pinamamatian han administrasyon an panawagan han mga katawhan lugod mas ginsusunod hini an militarista nga pamaagi ni anay Presidente Marcos.
Ginpahayag gihapon han Kadamay Tacloban nga an ira grupo la an may klaro nga panawagan ngan iginpapakigbisog.
Waray daw politiko nga nagpapaluyo han ira ginbuhat nga gi-us protesta taliwas han iba nga grupo hin raliyista nga daw sponsored hin politiko o di man ngani han gobyerno nga an panuyuan in samukon an ira ginkasa nga rally.
Mababaruan nga nagdumara hin nationwide protest an iba iba nga grupo ha Pilipinas agud ipahimatngon ha Malacañang an ira pagkondena han natatabo nga pamatay kasumpay han kampanya han administrasyon ala kontra han illegal nga droga ngan para gihapon ipahayag an ira kasubo hadton nagin biktima han martial law ha panahon ni Presidente Marcos.
