NATIONAL– Ginpapa-imbestigaran na ni Senate Deputy Minority Leader Risa Hontiveros ha Senado an mga water concessionaires matungod ha gin-aaligar nga joint venture agreements han mga ine ha water districts.
Ha Senate resolution 1352 nga ginhaon ni Hontiveros, nanawagan an senadora ha Senate Committee on Public Services nga magdudumara ine hin imbestigasyon ha mga joint venture agreements ha butnga han water districts ngan mga pribado nga kumpanya—nga nagreresulta ha kakulangan o palpak nga suplay hiton tubig.
Gintagan duon ni Hontiveros nga pira ha mga kasarabutan in nakit-an hiton Commission on Audit (COA) nga “disadvantageous” o dire nakaka-upay para ha mga konsyumer.
Kinahanglan gihapon kitaon an mga water concessionaires matungod nga damo nga mga Pilipino an dire nakaka-abat hin sakto nga serbisyo partikular na yana nga summer season.
Ine gihapon in ha kaluyo nga nagpahayag an Malacañang nga makakalaom ine ha imbestigasyon ha gin-aaligar nga pagkukulang han PrimeWater.
Ginatag gihapon hin duon han senadora nga matungod ha kakulangan han transparency ngan accountability mechanisms ha mga kasarabutan, nagigin makuri ha publiko nga papagbatunon an mga pribado nga concessionaire, mga board han water district, local water utilities administration, National Water Resources Board, an Commission on Audit, ngan an Public-Private Partnership Center.
