TACLOBAN CITY – Nakompleto na an irrigation project nga gin pondohan han Department of Agrarian Reform ha Lawaan, Eastern Samar.
Sumala kan Jose Alsmith Soria, Regional Information Officer hiton Department of Agrarian Reform VIII, dida han mga nakalabay nga adlaw in pormal nga gindumara an turn-over ceremony kun diin ginhatag an nakompleto nga proyekto ha Taguite Irrigators Association, Inc. para han maintenance na hine.
Pinaagi han pagkahuman han nasabi nga proyekto in paru-padayon na nga maawas an tubig ha mga umhanan ha bug-os nga tubig kun diin makakapag-tanom na an mga parag-uma bisan paman kun tag-mara.
An nasabi nga proyekto in gin implementar pinaagi han duha ka-phase ngan may kabug-usan nga pondo nga P6 million tikang ha ilarom han Agrarian Reform Fund (ARF) nga gin hatag han Department of Agrarian Reform (DAR).
Ginkakalakipan naman an proyekto hin construction hin sobra 200 meters han concrete main canal, 30 meters han flume, carabao crossing ngan turnout durante han syahan nga phase samtang, mayda gihapon kadugangan nga 228 meters han concrete main canal, 204 meters han lateral canal, turnout, head gate, ngan carabao crossing durante han ika-duha nga phase kun diin ha pagkayana in nagkaka-suplay na hin tubig nga tikang ha Taguite River ha maabot 30 ka-ektarya hin humayan.
Labot la han padayon nga suplay han tubig in magseserbi gihapon an nasabi ng proyekto kumo flood control durante hiton makusog nga uuran.
