Gin anunsyo ni Department of Interior and Local Government (DILG) Secretary Juanito Victor ‘Jonvic’ Remulla nga mahugot na nga igin didiri an pag irignom ha kalsada o ha ligid han kalsada.
Sumala hini, ini an pangunahon nga rason ha luyo han mga away ha dalan o diri man ngani in mga sexual harassment ha mga kababayen-an.
Samtang, gin mandohan naman ni Remulla an mga kapulisan sugad man an mga otoridad ha lokal nga panggobyernohan nga dakupon an himo man nga matalapas ha nasabi nga polisiya kumo kaparte han Anti- Public Intoxication Act.
Pag kalro naman ni Remulla, waray problema han pag iinom kun ini in bubuhaton ha sakob han panimalay ngan diri ha mga pampubliko nga lugar sugad hiton mga kalsada ngan agianan.
Ha lain nga bahin, nakatalaan gihapon ig patuman ha mga komunidad an implementasyon han Enhanced Curfew Hours para ha mga kabataan nga nag eedad 18 anyos tipaubos.
Subay kan Remulla, kun maabtan an mga kabatan-onan nga sakob han age range nga aada pa ha kakalsadahan lapos alas 10:00 han kagab-ihon in kinahanglan magpakita an mga ini hin pruweba nga parte ha iskwahan an rason kun kay ano aada pa hira ha gawas ha sugad nga pangorason o di man ngani proof of employment para naman ha mga working students.
Panuyuan han nasabi nga pitad in agud maiwasan an mga geng-geng nga kabataan nga magpatikang hin kasamok ha kalsada ha sugad nga mga oras ug agud masigurado nga talwas nga nakakauli ha ira mga panimalay an mga kabataan.
