Nagpahimatngon an Islamic Revolutionary Guard Corps nga posible targeton an pira nga dagko nga kumpanya han Estados Unidos nga nago-operate ha Middle East.
Subya ha ginpagawas nga panhayag, ada ha 18 nga kumpanys kaupod an Apple, Microsoft, Google, ngan Nvidia an ira ginkokonsidera nga “legitimate targets” kumo bulos ha pag-atake han US ngan Israel kontra ha Iran.
Nagpahimatngon gihapon an grupo nga posible magtikang an mga pag-atake ha ira gintalaan nga oras ngan gin aghat an mga empleyado han nasabi nga mga kumpanya nga magbakwit na agud masigurado an ira katalwasan.
Kaupod gihapon ha listahan an iba pa nga dagko nga tech company sugad han Intel, Oracle, IBM, Dell, Tesla, ngan Boeing.
Ha bulag nga pahayag, ginmalatumat han usa nga tinaglawas han Intel nga ira na gin uuna an katalwasan han ira mga empleyado ngan padayon nira nga ginbabantayan an sitwasyon ha rehiyon.
Sumala kan Healix CEO of Risk Management Firm James Henderson, dire na bag-o an sugad nga klase hin panarhog ngan nagigin kaparte na han moderno nga kasamok an pag-target ha mga tech complanies sugad han data centers ngan cloud systems.
Syahan na nga hipatik na naigo han Iran an pira nga data centers ha Middle East, nga nagdurot hin aberya ha mga digital services ha United Arab Emirates (UAE).
Kasumpay hini, nagpapadayon la gihapon an kasamok ha rehiyon mahuman an joint military operation han US ngan Israel dida han Pebrero 28, nga nagresulta han pagbulos han Iran.
Yinukot-yukot nga missiles ngan drones na an nahipatik nga gin bul-iwan ha magkadiru-dilain nga nasud ha Middle East.
Samtang, kumpyansa hi U.S. President Donald Trump nga makakagawas an U.S. military forces ha Iran ha sulod han duha ngada ha tulo kasemana.
