Naghulga an Iran nga ira papahaluagon an pagbalabag ha mga pangunahon nga ruta nga gin aagain han mga energy exports ha Middle East mahuman utro nga igpatuman han Estados Unidos an naval blockade ha mga pantalan hini ngan maglunsar hin mga panibag-o nga serye hin pag-atake harani ha Strait of Hormuz.
Nagpahimatngon gihapon Islamic Revolutionary Guard Corps (IRGC), nga ira sasaradhan an iba pa nga ruta nga ginagamit ha pagpagawas han lana ngan iba pa nga suplay han enerhiya nga natatagamtaman han US ngan mga kaalyado hini.
Samtang, ginmalatumat han US military nga nagdumara ini hin pito kaoras nga airstrikes ha palibot han Strait of Hormuz ngan mga baybayon nga kaparte han Iran.
Gin akusaran gihapon han Amerika an Iran nga responsable ha pag-atake ha pito nga commercial ships dida han nakalabay nga semana nga nagresulta ha pagkamatay ngan pagkasamad han pira nga mga tripulante.
Nagpahimatngon naman an Ian nga posible hini gamiton an mga kaalyado hini nga Houthi rebels ha Yemen agud pugngan an pag-agi han mga barko ha Ban el-Mandeb, usa pa nga importante nga ruta nga gin aagian han lana ngan iba pa nga kalakal nga nagdudugtong ha Red Sea ngan Gulf of Aden.
Nauna na nga nagpahimatngon an usa nga hitaas nga opisyal han Houthi nga posible nira saradhan an Bab el-Mandeb kun magpapadayon an mga pag-atake han Saudi Arabia ha Yemen.
Waray naman magpabantad ni US President Donald Trump nga ginpahayag nga tatargeton nira an mga pasilidad han enerhiya, power plants, ngan mga tulay ha Iran kun padayon ini nga magdidig-on nga abrihan an ira nuclear program.
