INTERNATIONAL – Utro nga ginsasayop han Iran an mga nasud ha Europa nga nagpapaluyo ha kapakyasan han 2015 Iran nuclear deal, pira ka-adlaw ugsa an nakatalaan nga paghimangraw ha Istanbul kaupod an Britain, France, ngan Germany.
Sumala kan Esmaeil Baqaei, tagapagyakan han Iranian foreign ministry, an kasabotan nga ginpirmahan dida han tuig 2015 in may panuyo nga limitaran an nuclear program han Iran kabalyo han pagtanggal han sirot.
Lakip ha mga purirma hini in an Iran, Britain, China, France, Russia, United States, ngan Germany.
Pero tigda nala nawara an nasabi nga kasabotan dida han tuig 2018 mahuman nga umatras an Estados Unidos ha ilarom ni US President Donald Trump, ngan utro nagpatuman hin sirot ha Iran.
Bisan nagpayahag hin suporta an EU, diri nagin epektibo an mekanismo nga pan-ekonomiya nga angay masalo ha epekto han mga sirot han Amerika.
Mahitungod hini, damo nga kompanya ha western countries an umatras ha Iran, nga amo an nagpaduroy ha krisis han ekonomiya han nasod.
Samtang, ginlala-oman nga paghihisgutan an posible nga pagbuhi utro ha nasabi nga kasabotan ha magigin paghimangraw ha Istanbul yana nga ti-arabot nga Biyernes, Hulyo 25.
