Posible nga tanggalon na an initial security screening ha Iloilo airport agud magkamay-ada hin mas haluag nga espasyo para ha mga pasaheros, subay ha Department of Transportation (DOTr).
Ginmanduhan ni Acting Transportation Secretary Giovanni Lopez an buhatan han airport nga magsumite han plano ha sulod han 15 kaadlaw para ha pagpapatuman han nasabi nga polisiya.
Sumala pa kan Lopez, ‘redundant’ na an initial screening, ngan ine gihapon an direktiba ni Presidente Ferdinand Marcos Jr. nga ig prioritize an pagigin komportable han mga pasaheros ha mga airport.
Sugadman in magpapabilin la gihapon an final security check ugsa makasulod ha boarding gates.
Igin rekomenda gihapon han DOTr an pagpapahaluag han passenger terminal building, pagpapadagmit han automated check-in gamit an facial ID recognition, ngan paghingayad ngan pagpapahaluag han runway agud makapagserbisyo hin mas dagko nga eroplano ngan damo nga international flights.
