NATIONAL – Huminay an inflation rate o kadagmit han pagsaka han presyo han mga papliton ha nasud ha 1.8% dida han bulan han Marso, subay ha Philippine Statistics Authority (PSA).
Ha usa nga presscon, ginmalatumat ni PSA USec. Claire Dennis Mapa nga an mas mahinay nga inflation rate dida han nakalabay na bulan an pangunahon nga resulta han mas mahinay nga paghitaas han presyo ha pagkaon ngan beverages, sugadman an pag-ubos han presyo han lana ha nasabi nga bulan.
Partikular nga gintudlok han opisyal an dako nga pag ubos ha presyo han bugas dida han Marso kumpara ha kaparehas nga bulan dida han 2024 kun diin nakaghipatik hin year-on-year decrease nga -7.7% dida han Marso. Ine na daw an pinakadako nga porsyento han pag-ubos han presyo tikang han Marso 2020 kun diin umubos an presyo han bugas ha -8.4%.
Samtang, labot la presyo han bugas, nakitaan gihapon hin pag-ubos hin presyo an mga karne ha 8.2% dida han Marso tikang ha 8.8% dida han Pebreo. Sugadman, gin amin han opisyal nga nagpapabilin nga hitaas la gihapon an presyo han mga baligya nga karne han baboy mahitungod ha epekto han African Swine fever (ASF).
