Ginlalauman nga padayon nga maursa an industriya han pampahusay ha Pilipinas yana nga tuig, kun diin ginbabana-bana nga mahitaas ha siyam ngada ha 10 porsyento an kantidad han pamaligya tikang ha nahipatik nga P320.05 milyon dida han nakalabay nga tuig.
Sumala kan Chamber of Cosmetics Industry of the Philippines Inc. President Janina Tan, nagpapabilin nga madig-on an demand para ha mga produkto nga pampahusay ngan personal care mahitungod ha hitaas nga paghahatag hin importansya han mga Pilipino ha ira pisikal nga panlawas. Dako gihapon an bulig han nagtitikadako nga online market ngan han populasyon han nasud ha pag-ursa han industriya.
Gin malatumat gihapon ni Tan nga ginlalauman nga magigin pangunahon nga rason han pag-upay han pamaligya yana nga tuig an nagtitikahitaas nga demand para ha mga sun care products.
Ha kaluyo han paghitaas han presyo han lana ngan iba pa nga papliton durot han mga pankalibutan nga panhitano, padayon nga nahitaas an online sales han mga produkto nga pampahusay.
Samtang, tampok ha Cosmobeaute Philippines 2026 nga gindudumara ha World Trade Center an 250 nga lokal ngan internasyonal nga exhibitors. Ginlalauman nga tatambungan ini hin ada ha 8,000 trade visitors ngan magseserbi nga dalan agud mapahaluag pa an merkado han mga produkto nga pinoy ha iba nga nasud pinaagi han bulig han Department of Trade and Industry.
