TACLOBAN CITY – Gintikangan yana nga adlaw an implementasyon han Scan System ha syudad han Tacloban nga nagpapanuyo nga mapadagmit an contact tracing may paghisumpay han COVID-19.
Sumala kan Randy Calahi, head han Management Information System Division han Tacloban City Government, kada establishmento ha syudad in mayda QR code reader para han mao nga scan system ngan mayda gihapon mga barangay ha syudad nga naghatag na hin mga pass card o scan card ha ira mga molopyo.
An mga dire taga Tacloban in pwede naman nga makapagdownload han ira QR code ha www.safecity.gov.ph
Gin-establisar an mao nga scan system ha syudad agud nga malikayan na an mano mano nga pagsusurat han ngaran, address, edad ngan iba pa nga impormasyon han mga katawhan nga nasakob ha mga establishmento ha syudad.
Nagpapadayon naman an online registration han QR code kun diin ha pagkayana in maabot na ha 50,000-60,000 an nagparehistro labot pa han mga molopyo ha syudad nga natagan hin QR pass card nga maabot ha 70,000.
Nahibaruan nga an ginkikinahanglan la nga impormasyon para makaregister han QR code amo an ngaran, address ngan contact number han usa katawo.
