TACLOBAN CITY – Nagpagawas hin bag-o nga balaudnon an buhatan han Land Transportation Franchising and Regulatory Board LTFRB Region 8, ha nakalabay la nga semana may paghisumpay ha ‘Bawal Bastos Law’.
Sumala Veronica Reposar, Transportation Development Officer II LTFRB Regional Office-8, ine nga ‘Bawal Bastos Law’ in kasumpay ha ginhihimo nga drivers academy tungod nga mga drivers man iton kaupod hine nga balaud.
Subay han mao nga opisyal, ginapagawas ine nga Memorandum Circular dida la han nakalabay nga semana pagpahinumdum ha mga drivers kun ano itun ira sadang ngan dire dapat buhaton ha sakob hiton sakaryan.
Nasususbay ha mao nga balaodnon nga mayda gihapon kaka-atubangon nga penalidad an mga pasaheros kun na mga ine mag-intirimis hin dire maupay ha ira igkasi-pasaheros sugad hiton pagsit-sit ngan pagsipol ha mga ine.
Nagpahimatngun naman an mao nga opisyal nga mamaghinay-hinay ha panyakan ngan pagtratar, labi na ha mga kababayen-an ngan ha mga LGBTQ.
