TACLOBAN CITY – Nagin malinampuson an syahan nga adlaw han implementasyon han bag-o nga ruta han mga multicab nga Tacloban – Campetic.
Ine an ginpahayag ni TOMECO Operation and Enforcement, Restituto Reglos.
Dugang pa hine, an nasabi nga implementasyon in mahitungod han ginpapatuman nga ordinansa ha syudad han Tacloban maypaghisumpay han Local Public Transport Route Plan (LPTRP), kun diin dire bulig ha LPTRP han syudad an ruta nga daan nga ruta han nasabi nga multicab.
An dati manggud nga ruta hine in nalibot pa ha syudad han Tacloban tikadto ha downtown ngan pabalik ha Campetic, samtang an bag-o naman hine nga ruta in, tikang ha Campetic, pagsulod hine ha Tacloban in madiretso ine ha Marasbaras ngan maliko ha may Boy Scout Rotonda, diretso ha may Angelicum nga karsada, ngan tadong na tikadto ha Abucay New Bus Terminal vice versa.
Damo naman daw an naghangyo nga dire la anay ig patuman an nasabi nga ordinansa, pero sumala pa hine, nasunod la hira han mando, pero kun mayda man magin bag-o nga kamanduhan tikang ha mga labaw nga posisyon in susundon naman nira.
Samtang, pira naman nga mga multicab han Campetic an waray bumiyahe ha syahan nga adlaw han pag-implementa han nasabi nga ordinansa, mahitungod na gihapon han kakulangan han pasaheros pakadto han bag-o nga ruta.
