NATIONAL–Ginduon ni ACT Teachers Partylist Rep. ngan Deputy Minority Leader Antonio Tinio nga mayada klaro ngan ensakto nga basehan an impeachment kontra kan Vice President Sara Duterte kasumpay han ginaalegar nga maanomalya nga paggamit hiton Confidential Funds.
Ha pagdungog han impeachment yana nga adlaw, ginpahayag ni Tinio nga han July 2022 in ginaalegar nga humangyo hi Duterte hin Confidential Funds bisan waray pa gin-alatuga nga sugad nga pondo para han Office of the Vice President (OVP) ngan Department of Education (DepEd).
Ginmalatumat gihapon ni Tinio nga nagtikang an P125-M ha discretionary fund han Pangulo ngan ginaalegar ga naubos ine sulod hiton 11 la ka adlaw.
Sumala pa ha iya, nagpagawas gihapon an Commission on Audit hin Notice of Disallowance para han P73-M, samtang, umabot ha P612.5-M an kabug-osan nga CF han OVP ngan DepEd nga ginkwekwestyon tikang han 2022 kutob 2023.
Ginmalatumat gihapon niya nga an ginaalegar nga mga kwestyonable nga dokumento ngan resibo, kalakip an ngaran nga “Mary Grace Piattos.”
Sumala pa kan Tinio, posible nga ma-impeach an Bise Presidente mahitungod ha betrayal of public trust, gross abuse of discretionary powers, kawaray hiton transparency, ngan ginaalegar nga pagbaliwaray ha oversight powers han gobyerno.
Gintagan gihapon hin duon hine nga dire pulitika kundi pagbabaton an istorya, ngan an pampubliko nga posisyon in usa nga pampubliko nga pagtapod nga dapat batonon.
