Gin tagan duon han House prosecution panel nga diri angay ma delatar o maapektuhan han bisan ano nga balasahan ha liderato han Senado an nagpapadayon nga proseso han impeachment trial kontra kan Vice President Sara Duterte.
Sumala kan Lanao del Sur Representative Zia Alonto Adiong, tagapagyakan han panel, an karuyag nga mahinabo han house panel in bug-os nga mailatag sugad man waray pagkakadelatar ha mga ebidensya ngan testigos ha atubangan han Senate impeachment court.
Pag eksplika ni Adiong, katungod han mga Pilipino nga mahisabutan an mga ebidensya sugad man katungod gihap han bise presidente nga diri madelatar an hearing.
Dugang pa hini an impeachment in usa nga pagpamatuod nga waray bisan hino nga opisyal, mapahitaas man an posisyon, an talwas ha responsibilidad ha ilarom han Konstitusyon.
Ini in kasunod han mga impormasyon nga nagplaplano an minority bloc han Senado nga ig duso hi Senator Sherwin Gatchalian nga balyuan hi Senate President Alan Peter Cayetano nga bag-o la nga lumingkod ha pwesto dida han Mayo 11.
Sumala kan Adiong igin kukonsidera kumo “internal dynamics” han Senado an iristuryahon han liderato sugad man iginrerespeto han Kamara an magkabulag nga institusyon.
Nakatalaan magsumiter hi Duterte han iya baton ha Articles of Impeachment ha maabot nga June 1, 2026 samtang temporaryo naman nga igin schedule han Senado an pagtikang han pre-trial proceedings ha maabot nga July 6, 2026.
