Bumwelta hi House Prosecutor Terry Ridon ha nauna nga patutsda han defense team ni VP Sara Duterte nga naglalaum la daw an mga magbabalaod nga membro han prosecution panel ha mga private lawyer para ha kaso kontra ha bise presidente.
Nag-ugat an pahayag han defense team ha maiha nga pre-trial conference nga nagtikang pa dida han nakalabay nga semana.
Sumala kan Defense member Atty. Mark Vinluan, naatender la ha aga an mga public prosecutors pero nalakat gihapon pagkakaiha ngan ginbabayaan an trabaho ha mga private prosecutors.
Bwelta ni Ridon, aktibo nga nakikiusa an mga public prosecutors ha conference ngan ha ngatanan han proseso nga kinahanglan agud matapo dayun an pre-trial conference ngan magtikang na an trial.
Ha kamatuuran daw, tulo kaadlaw na an pre-trial conference ngan ha ngatanan han mga ini in nakadto hiya kutob ha kahuman.
Ginklaro gihapon hi Ridon nga dire ini isyu han manpower, kundi problema ha kadamo han mga dokumento ngan pages nga kinahanglan pirmahan han parehas defense ngan House prosecution team.
Ha presente, padayon an pagmamarka ha mga documentary evidence han magkaluyo nga parte para ha nakatalaan nga pagdungog, ngan ada ha 50% na an nahuman tikang han tikangan an nasabi nga conference.
