Gin sigurado ni San Juan City Rep. Ysabel Maria Zamora dida han Sabado nga dire magigin balaong an impeachment proceedings kontra kan Bise Presidente Sara Duterte ha pagbaton han Kamara ha mga nasyunal ngan pankalibutan nga krisis.
Sumala kan Zamora, Vice Chair han House Committee on Justice, padayon nga ginbubuhat han Kongreso an mandato hini ha kaluyo han mga gin kakaatubang nga ayat sugad han kasamok ngan krisis ha enerhiya ha iba nga nasud.
“Hindi naman po porket ongoing ang impeachment sa Committee on Justice ay napapabayaan na ng Congress o ng House of Representatives ang trabaho nito,” pag-eksplikar pa ni Zamora.
Gintagan-duon han magbabalaod nga mayda ginsusunod nga constitutional timeline nga 60 session days an komite agud tapuson an hearing, sanglit dire nira pwede ig undang an proseso.
Dugang pa hini, samtang nagpapadayon an kaso ha Committee on Justice, an iba nga mga komite ngan buhatan han ehekutibo in padayon nga nagtatrabaho han ira mga trabahuon.
Ginmalatumat gihapon ni Zamora nga bisan naka-recess an Kongreso tikang Marso 21 kutob Mayo 3, padayon la gihapon an pagdungog han komite mahuman hira tagan hin otoridad han plenaryo.
Dire daw gihapon makakaulang an mga petisyon nga iginsalawad ha Korte Suprema ha pagpapadayon han ira panginano ha mga ebidensya ngan testimonya.
Ha presente, ada na ha hearing proper an kmoite agud tudlukon kun mayda probable cause an duha nga sasalin nga reklamo han impeachment kontra ha Bise Presidente.
