TACLOBAN CITY – Padayon an ginbubuhat nga imbestigasyon han mga kapulisan bahin han nahitabo nga pagpusila-patay ha konsehal ha bungto han Pinabacdao, Samar.
Sumala kan Pol. Col. Glen Oliver Cinco, Provincial Director han Samar Police Provincial Office (SPPO), pagkita nira in medyo timprano pa kun an motibo han insidente in may paghisumpay ha pulitika pero dire naman ginpapaligid han mga kapulisan an mao nga anggulo.
Subay ha imbestigasyon waray naman nakarawat nga hulga ha kinabuhi an mao nga biktima san-o pa man an mao nga insidente hin panmumusil pero nagtutuo an mga kapulisan nga an biktima la an target han mga suspek tungod nga waray han mga ini labti an kaupod han biktima nga igkasi gihapon konsehal hini.
Mahinunumduman nga nagmamaneho han iya single nga motorsiklo an mao nga biktima sakay an angkas hini ngan tikadto unta ha poblacion para umatender hin sesyon han pagpamumusilon ini han mga suspek nga sakay ha usa nga pribado nga sarakyan.
