NATIONAL – Umabot na ha 117,371 influenza-like illness (ILI) an kabug-usan nga nahipatik han Department of Health tikang dida han Enero kutob ha presente.
Tikang ha sobra 117,000, umabot na gihapon ha 126 an kabug-usan nga ihap han mga namatay kutob ha kabutngaan han Setyembre.
Ha kaluyo hine in ginpahayag han DOH nga mas habubo la gihapon an ihap han mga nahipatik nga kaso han ILI yana nga tuig kumpara dida han nakalabay nga tuig, han kaparehas nga period.
Umabot manggud ha 137,980 an kabug-usan nga nahipatik ha syahan nga siyam kabulan dida han nakalabay nga tuig.
Mas habubo daw gihapon an ihap han mga namatay yana nga tuig kumpara dida han nakalabay nga tuig nga umabot ha 142.
Samtang, utro naman nga nagpahinumdom an DOH ha publiko nga batasanon an paghugas han kamot, pagsul-ot han facemask ha mga matawo nga lugar, ngan pagpapabakuna.
