Nagpahamtang an Estados Unidos hin sanction kontra kan International Criminal Court (ICC) President Tomoko Akane ngan senior trial lawyer nga hi Abdoulaye Seye, ha pinakabag-o nga pitad han administrasyon ni US President Donald Trump kontra ha international court.
Sumala kan US Secretary of State Marco Rubio, ginpailarom ha sanctions an duha nga opisyal ha ilarom han executive order ni Trump nga nagtutugot hin sirot kontra ha mga indibidwal nga dabi ha pira nga pitad han ICC kontra ha mga opisyal han mga nasud nga waray tumugot ha hurisdiksyon han korte.
“These individuals have directly engaged in efforts by the ICC to investigate, arrest, detain, or prosecute officials whose government has not consented to ICC jurisdiction,” pahayag ni Rubio dida han Martes, Agosto 18.
Hi Akane in usa nga Japanese judge ngan presente nga presidente han ICC, samtang hi Seye, usa nga Senegalese national, in senior trial attorney nga kalakip ha prosecution team nga naghangyo hin arrest warrant kontra kan Israeli Prime Minister Benjamin Netanyahu. Nominado gihapon gi Seye agud magin hukom han ICC.
Maduon nga ginkondena han ICC an pitad han Washington ngan ginpahayag nga makakaruba ini ha rule of law ngan ha pagkalibutan nga sistema nga panhukmanan.
“When judicial actors are threatened for applying the law, it is the international legal order itself that is placed at risk,” pahayag han ICC.
Ha ilarom han sanctions, pwede ig-freeze an anuman nga propyedad han duha nga ICC officials nga ada ha hurisdiksyon han Estados Unidos ngan mapahugtan an ira access ha US financial system.
Nagpagawas naman an US Treasury hin katugutan para ha wind-down han pira nga transaksyon may paghisumpay kanda Akane ngan Seye kutob Setyembre 17.
