NATIONAL – Gin aghat han grupo han mga human rights lawyer an International Criminal Court (ICC) nga dire abuyunan an petisyon ni anay Presidente Rodrigo Duterte para ha interim release.
Ginmalatumat han Center for International Law (CenterLaw) nga maibubutang ha hulga ngan kadelikaduhan an mga biktima, testigos, human rights defenders, ngan iba pa nga nakiparte ha imbestigasyon han ICC ha oras nga temporaryo nga pagawson an anay presidente ha waray na ngarani nga nasud.
Kumo nagserbi daw nga legal counsel han damo nga biktima han madugo nga war on drugs han anay presidente, duro hira nga nababaraka nga an paggawas ni Duterte tikang ha kustodiya ha ICC in direkta nga magin hulga ha katalwasan, seguridad, dignidad, ngan privacy han mga biktima ha Pilipinas ngan ha iba nga nasud, sugadman makakaguba ha integridad han naghuhulat nga pagdungog ha iya kaso nga crimes against humanity.
Duon pa han mga grupo, mas grabe pa an gin-abat han mga drug war victims nga ginkuhaan hin due process ngan ginsentensyahan hin summary execution sa mga karsada ngan mga balay dinhi ha Pilipinas, kumpara ha presente nga gin aabat ni Duterte ha detention facility han ICC.
Ha katapusan, nakiusa na grupo ha haluag nga panawagan tikang ha mga pamilya han mga biktima, Filipino civil society, ngan international community of human rights defenders ha nag-aaghat ha ICC nga direan an petisyon han anay presidente nga igpadayon nga dunggon an iya kaso nga crimes against humanity hin nasusubay ha internasyunal nga balaod.
