Ginbatikos an Integrated Bar of the Philippines (IBP) mahuman nga ighatag han Davao City Chapter hine an “Golden Pillar of Law” award kan anay Pangulong Rodrigo Duterte, nga presente nga naatubang ha International Criminal Court ha The Hague mahitungod ha crimes againts humanity.
Subay ha IBP national office, rerepasuhon nira an mga aludayday ha paghahatag hin pagkilala agud masigurado nga an mga masunod nga pagkilala in mareplika ha integridad han serbisyo ngan pagigin tangkod ha hustisya.
Pag-eksplikar ni IBP Communications Director Katrina Mordeno, an pagkilala in dire nangangaruyag sidngon hin pagsuporta o moral absolution para kan Duterte, kundi pagkilala la ha sobra 50 katuig nga serbisyo ha propesyon han anay presidente.
Sugadman, aminado ni Mordeno nga naiintindihan han IBP an moral concern han publiko, mahitungod ha mga akusasyon nga pagtalapas ha katungod pantawo ha ilarom han administrasyon ni Duterte.
Ha kaluyo hine, iginduon han IBP Davao City Chapter nga an pagkilala in “dire pag-endorso han personal nga ideolohiya o trabahuon nga politikal,” kundi simple nga pagkilala ha prospeyunal nga tindog han mga abogado ha “good standing.”
