NATIONAL NEWS– Naghangyo an House prosecution panel ha Senate impeachment court hin 62 trial dates para maiprisinta an ira mga ebidensya ha impeachment case kongtra kan Vice President Sara Duterte.
Sumala kan House legal spokesperson Atty. Benjamin “Jay” Tolosa Jr., nasusubay an hangbyo ha kadamo han saksi ngan ebidensya nga nakalista ha ira pre-trial brief.
Samtang, 30 trial dates la an ginhahangyo han kampo han depensa ni VP Sara.
Ginklaro ni Tolosa dire karuyag sidngon nga 62 ka-adlaw an hearing matungod pwede ine pahaliguton han korte.
Dugang pa hine an mga saksi nga 97 an nakalista han depensa kalakip na an 51 nga mga witnesses kaparehos ha listahan han prosekusyon.
Lasbot dinhe, 248 ha 276 ebidensya han prosekusyon an kalakip ha mga ebidensya nga iginsumiter han depensa.
An pinal nga ihap han trial dates in nakatalaan han Senate impeachment court nga igpapagawas ha pre-trial order.
