NATIONAL – Ginkokonsidera han House prosecution panel nga malinampuson an 5 ka-adlaw nga pretrial proceedings ha impeachment case ni Vice President Sara Duterte ha kaluyo nga pakyas an ira kampo nga ma-abrehan an box tikang ha Bureau of Investigation (BIR) nga posible may sulod nga tax record han bise Presidente ngan asawa hine nga hi Atty Mance Carpio.
Ginmalatumat ni lead prosecutor Rep. Gerville Luistro,nga nakuha han prosekusyon an ira panuyo nga mahuman dayon an pretrial conference ngan ma-iandam an kaso para ha pagtitikang han impeachment trial ha Hulyo 6.
Dugang pa hine, waray na nira ungayi pa an mga isyu nga ginlalatag han kampo han depensa agud nga dire ine maapektaran an ira trabaho ngan mapadagmit an proseso han pretrial.
Kasumpay hine, ginkokonsidera gihapon ni Rep. Joel Chua, nga dako nga ayat ngan nag pagdugay hiton proseso ha pretrial an dire pag-abuyon han defense team ha common markings para ha magkaparehas nga dokumento nga gagamiton han duha nga kampo.
Una na nga ginmalatumat ni Atty. Michael Poa nga may insidente ha pagmamarka han pareho nga dokumento in nagkulang hin usa ng page han dokumento han prosekusyon sanglit mas maupay nga magkamadya an duha nga kampo hin kalugaringon nga proseso han pagmamarka ha ira igrerepresenta nga dokumento han ebidensya.
Ha pagkayana, ginhuhulat nala han duha nga kampo an pagpagawas han pretrial order han impeachment court ngan an pormal bnga pagtitikang han impeachment trial ha Hulyo 6.
