Gin pakusog pa han House prosecution panel an ira legal team mahuman igpakilala an ikaduha nga batch han private prosecutors nga mabulig ha pagpakiana kan Vice President Sara Duterte ha tiarabot nga impeachment trial ha Senado.
Kaupod ha mga bag-o nga private prosecutors hira:
- 1. Atty. Theodore Te
- 2. Atty. Reynaldo Robles
- 3. Atty. Arnold Labay
- 4. Atty. Mae Divinagracia
Subay ha House prosecution, an upat in mayda haluag nga eksperyensya ha constitutional law, criminal ngan civil litigation, election law, corporate law, human rights, ngan legal education. Makakaupod nira hi Atty. Benjamin Tolosa ngan an syahan nga grupo han napulo nga private prosecutors ha pagsasalawad han ebidensya kontra ha bise presidente.
Aatubangon ni VP Duterte an impeachment trial kasumpay han mga alegasyon han sayop nga paggamit han P612.5 milyon nga confidential funds, dire matuod-tuod nga deklarasyon ha iya SALN, unexplained wealth, ngan mga hulga nga pahayag kontra kanda Presidente Ferdinand Marcos Jr., First Lady Liza Araneta-Marcos, ngan anay House Speaker Martin Romualdez.
