An House Bill No. 04745 in ginduduso na balaodnon ni Cong. Ferdinand Martin G. Romualdez ngan gin-aprubaran na ine han Kongreso.
Matatawag ine na “game-changer” ha edukasyon,labi na para ha mga estudyante nga hagrayo ngan nag-uukoy ha delikado nga lugar.
An House Bill No. 04745 in nagpapanuyo nga magtindog in pampubliko nga eskwelahan ha Geographically Isolated and Disadvantaged Areas (GIDAs) ngan mga komunidad nga apektado han kasamo agud nga dayon mabaton an gintatawag nga “last-mile” problem ha edukasyon.
Sumala kan Lanao del Sur Rep. Zia Alonto Adiong, baton ine ha madugay na nga problema kun diin napipiritan nga magbaktas hin pira ka-oras an mga estudyante para maka-abot an mga ine ha ira eskwelahan.
Usa ha mga rason mangud nga nag-dra-drop-out an mga estudyante matungod han kaharayo han ira eskwelahan.
Subay ha datos han DepEd, sobr 2.5 milyon nga estudyante an nag-uukoy ha GIDAs, samtang subay naman ha Save the Children Philippines, upat ha kada napulo nga pamilya ha higrayo nga lugar an nagsisiring nga an distansya an pangunahon nga rason sanglit dire nakaka-eskwela an kabataan.
An balaodnon in ginmanduhan an DepEd nga kitaon an mga prayoridad nga lugar, magtindog ngan magtudlok hiton mga magturotdo ha eskwelahan, maghimo gihapon hin talwas nga access roads, ngan siguraduhon nga padayon an pondo para ha pag-atiman han imprastraktura.
Gin-aaghat han manbaralaod an Senado nga aksyunan ine dayon ha dagmit nga panahon, agud nga matikangan an mga ine ngan mahirani an edukasyon ha mga komunidad nga madugay na nga nabayaan.
Ha pagkayana, an HB No. 04745 in presente nga nakabinbin ha Senado.
