Igin parayaw ni House Majority Leader Sandro Marcos an pagpasar han Kamara ha 18 LEDAC priority measures ugsa an Holy Week break.
Sumala kan Marcos, an track record han Kamara ha LEDAC in pamatuod nga dire nagin balaong an mahuot nga session calendar ha pagduduso han mga reporma nga pan-ekonomiya, serbisyo-publiko, ngan proteksyon nga pankumunidad.
Gintagan-duon ni Marcos nga ‘masigasig’ an Kamara ha pagpasar han mga prayoridad nga panukala han administrasyon, ngan igin parayaw hini an mga nakab-ot nga kalangpusan ha ilarom han pagmamangulo ni Speaker Bojie Dy III.
Gin dayaw gihapon hini an dayun nga pagpasar ha panukala nga balaod nga naghahatag hin kapas ha Presidente nga ibanan o igsuspendi an excise tax ha petroleum products.
Dugang pa hini, ini an kinahanglan han publiko para ha “immediate relief” kontra ha hitaas nga presyo han gasolina nga nagpapahitaas gihapon han gastos ha transportasyon ngan pangunahon nga papliton.
Pag-eskplikar pa ni Marcos, an mga naipasar nga balaod in dire la basta inihap, kundi “pamatuod han usa nga working House” nga an makinarya in nadalagan hin malaksi para ha publiko.
Igin dugang han Majority Leader nga an Holy Week break in usa nga “pause” la ngan dire paghinay han ira mga panuyo.
Ha 18 nga naipasar, pinaka-abante an pag-ugsod han BARMM Elections nga human na an bicameral stage, samtang an National Center for Geriatric Health in presente na gihapon nga gin pipinalisan.
Kaupod gihapon ha mga prayoridad nga nakalusot an EPIRA Amendments, Waste-to-Energy, Extension ng Estate Tax Amnesty, ngan an panukala nga naghahatag hin kapas ha Presidente nga suspendihon an excise tax ha petrolyo agud maghatag hin ‘ginhawa’ ha butnga han paghitaas han presyo han papliton.
Labot pa hini, ada na gihapon ha pipeline an National Land Use Act ngan an pagpapakusog han 4Ps.
Ha presente, mayda kabug-usan nga 9,632 measures na an naipasaka ha Kamara, nga sumala kan Marcos, nagpapakita hin usa nga “working House” nga andam bumaton ha panginahanglan han administrasyon ngan an publiko ha pagbalik han sesyon.
