TACLOBAN CITY- Ginkumpirma han HIV-STI Program Eastern Samar, nga ada na ha 180 total confirmed cases hiton Human Immunodeficiency Virus (HIV) an nahipatik tikang han 1989 kutoba han nakalabay nga bulan han Marso han presente nga tuig.
Sumala kan Meghann Faye Villanueva, Provincial Coordinator HIV-STI Program Eastern Samar, ha mao nga ihap an Borongan City an mayda pinakadamo nga kaso kun diin maabot ine ha 31 nga kaso hiton HIV, samtang ginsusundan ine han Guiuan ngan Dolores Eastern Samar, nga mayda parehos 18 nga kaso, ngan nag ika-tulo naman dinhi an Oras Eastern Samar nga mayda 14 nga kaso hiton nasabi nga sakit.
Dugang pa hine, 12 nga mga kababayen-an nahipatik han ira buhatan nga nagpositibo han nasabi nga sakit, samtang 168 naman iton mga kalalakin-an.
Subay ha ira nakuha nga panginanu an kadam-an nga mga nagpositibo han virus, in kalalakin-an, kun diin usa ha ira ginkikita nga rason an pakikig-hilawas ha kaparehos gender, samtang mayda naman pipira nga mga kababayen-an an kalakip ha nasbai nga mga nagpositibo.
Ginmalatumat pa hine, an pinaka bata nga nagpositibo nga ira nahipatik in nag-eedad hin 15-anyos paubos.
Samtang ada naman ha may pinakadamo nga nagpositibo an age group nga 25-34 years old paigbaw.
Ha pagkayana, nagdudumara hira hin pagpahuruhugot nga contact tracing han mga partners nga naikokonsidera nga nagpositibo han nasabi nga virus.
