TACLOBAN CITY — Ginduduso yana hiton HIV-STI Program Eastern Samar, an gintatawag nga ABCDE approach ha publiko, agud nga malikayan an pagsarang ngan paghitaas hiton kaso han natatapnan han Human Immunodeficiency Virus (HIV) ha nasabi nga lugar.
Sumala kan Eastern Samar Provincial Coordinator HIV-STI Program, Meghann Faye Villanueva, pukos hine nga approach in para ha mga kabatan-unan, nga kasagaran hira an numero uno nga nagkakamayda han nasabi nga sakit.
Adi naman an karuyag sidngon han ABCDE approach:
- A – Abstinence o paglikay ha pakikipag-hilawas
- B – Be mutually faithful o pagkakamay-ada hin usa la nga partner
- C – Consistent use of condom o pirmi nga paggamit hin condom
- D – Don’t use drugs o paglikay ha paggamit hin ilegal nga droga
- E – Educate yourself o pagiging maaram parte han HIV
Dugang pa ni Villanueva, may-ada na yana Pre-Exposure Prophylaxis (PrEP) ha Eastern Samar Provincial Hospital (ESPH) ngan Feliciano Ambrosio Memorial Hospital (FAMH).
An nasabi nga PreP in usa nga tambal agud nga kontrahon an HIV, labi na ha mga indibidwal nga mayda magkalain-lain nga sexual partners.
Ginklaro naman ni Villanueva, nga dire hine sakop nga makokontra an sexually transmitted infections (STIs), kun diin padayon nira nga gin-aaghat an publiko nga gumamit hin contraceptive sugad hiton condom.
Manunumduman, nagpagawas hin datos, an Department of Health (DOH), nga duha nga kababayen-an na namatay yana nga tuig matungod hiton HIV.
Nanawagan naman ine ha publiko, likayan an risky sexual behavior, ngan magpa konsulta ha doktor. (via Bombo Shiela Encio)
