TACLOBAN CITY– Narekober han 14IB ngan 93ID Philippine Army an mga High powered firearms ha Brgy. Mahilum Hindang Leyte.
Sumala han 802nd Infantry Brigade 8ID Philippine Army, Civil Military Operation Officer, Cpt. Ma Angela Jane Gaitera, nakuha nira an nasabi nga mga armas, tungod han impormasyon nga iginhatag han mga anay rebelde nga nakabalik na ha gobyerno.
Dugang pa, na-ukab han mga tropa-militar an tagoan hin mga armas nga may sulod nga 1 nga M60 machine gun, 1 nga M16 rifle, ngan usa nga M14 rifle komo kaparte han ginpakusog nga operasyon nga may panuyo nga bungkagon an nagtitikaguti nga pwersa han NPA ha rehiyon.
Nahibaruan liwat han militar, nga an mga higamit nga ira nakuha in gintatag-iyahan han nabibilin nga Island Committee (IC) Levox han NPA, nga nag-ooperate ha kabubkiran han Isla han Leyte.
