Umatubang kakulop nga adlaw hi anay Department of Public Works and Highways (DPWH) Bulacan 1st District Assistant Engineer Brice Ericson Hernandez ha Independent Commission for Infrastructure (ICI) ha syahan nga hearing han komisyon kumo kaparte han halarom nga imbestigasyon kasumpay ha daw iregularidad ha mga flood control projects ha Bulacan.
Sumala kan Baguio City Mayor Benjamin Magalong, Special Adviser han ICI, napagdesisyunan ni Hernandez nga makigbinuligay mahuman mai-eksplikar haiya an mga posibilidad ngan kahingangadtuan han iya desisyon.
Dugang pa ni Magalong, haira pagdungog in mayda mga impormasyon nga iginpaangbit hi Hernandez nga posible magin bag-o nga lead ha ira impormasyon. Iginbuyagyag daw hine an ngatanan han detalye nga maaram hiya ngan pira hine in waray pa niya kaisusumat ha mga forums ngan hearings nga nahitabo ha mga nakalabay nga semana.
Labot kan Hernandez, umatubang gihapon ha ICI hi anay DPWH Secretary Manuel Bonoan agud maghatag hin eksplinasyon.
An nagin pagdungog in closed door meeting pero ginlalauman pa nga magpapadayon an mga pagdungog han Independent Commission ha mga masunod nga adlaw, ngan damo pa nga personalidad an iimbitahan agud tumestigos.
