Nagpadara hi Health Secretary Ted Herbosa han iya letter of resignation ngadto kan Presidente Ferdinand Marcos Jr. yana nga Lunes, Hulyo 13.
Base han kopya han iya surat nga naka-address ha Department of Health, nagpahayag hi Herbosa nga kasunod han iya operasyon ha tuhod, nasantop niya nga kinahanglan niya hirutan an iya kalugaringon.
Dugang ni Herbosa, nga magpapailarum hiya hin extensive rehabilitation ha sakob hin tulo ngadto ha upat ka bulan.
Nangaro gihapon hin pasaylo hi Herbosa kun pakyas an iya pagserbi komo DOH secretary.
Ha pagkayana in nangangaro gihapon hin pahayag an Bombo Radyo tikang han tagapagyakan han DOH nga hi Usec. Albert Domingo kasumpay han nahisumat nga pagresign ni Herbosa.
Waray gihapon kumpirmasyon tikang ha Malacañang nga may kalabutan hini.
Manunumduman nga nauna na nga nagkumpirma an tagapagyakan han Department of Health nga hi Usec. Albert Domingo nga tikang han Hulyo 6 pa nga naka-sick leave hi Herbosa tungod han iya knee replacement surgery.
Ginbalita naman ni Usec. Domingo nga nagin malinampuson an mao nga operasyon ngan ha pagkayana in nagpapailarum na hin physical therapy ngan rehabilitasyon hi Herbosa.
Temporaryo nga ginsaliwanan ni Domingo hi Herbosa komo DOH officer-in-charge.
