TACLOBAN CITY– Mandatoryo nga ginpapagsul-ot hin face mask an mga empleyado han City Hall ha syudad hiton Tacloban.
Sumala kan Dr. Danilo Ecarma, Head hiton Tacloban City Health Office, ine in usa nga mandato nga ginpalusad han alkalde han syudad tungod nga ginlalauman nga damo iton maulpot ngan magtitirok nga tawo yana nga tipaarabot nga kapatronan.
Dugang pa ni Ecarma, nga an rason mangud hine in tungod an kadam-an nga mga empleyado han gobyerno in aada naka-deploy ha mga matatawo nga lugar.
Samtang, bisan man waray nagpalusad an siyudad hiton mandatoryo gihapon nga pagsul-ot han facemask hiton mga molupyo, nagpahimatngun naman ine ha ngatanan nga magsul-ot la gihapon hin face mask labi na ha mga senior citizen, persons with comorbidities, ngan mga burod kun aada ha mga matatawo nga lugar agud makalikay hiton mga sakit.
